2 oktyabr tarixində sayca 10-cu dəfə keçirilən Bakı Beynəlxalq Kitab Sərgisinin (Baku Book Fair 2024) açılış mərasimi baş tutub. Bakı Ekspo Mərkəzinin ev sahibliyi etdiyi sərgidə 19 ölkədən 47 xarici təşkilatın, o cümlədən, 100-dən artıq yerli nəşriyyat-poliqrafiya evlərinin iştirakı nəzərdə tutulub. Sərgidə Azərbaycanla yanaşı, Türkiyə, İrlandiya, Almaniya, Venesuela və digər ölkələrdən tanınmış yazıçı və şairlər öz sevərləri ilə görüşə gələcək.
Dahi mütəfəkkir Məhəmməd Füzulinin 530 illiyinə həsr olunmuş sərgi üçün zəngin proqram tərtib olunub. Kitab bayramı çərçivəsində uşaqlar və böyüklər üçün ustad dərsləri, kitab təqdimatları, imza günləri, konfranslar, müsabiqələr, qiraət və musiqi saatları təşkil olunacaq. Sərgi müddətində müxtəlif formatlarda ümumilikdə 270-dən çox tədbirin təşkili nəzərdə tutulur.
Qeyd edək ki, 2-8 oktyabr tarixlərində baş tutacaq sərgiyə giriş ödənişsizdir. Sərgi hər gün saat 10:00-dan 20:00-dək ziyarət üçün açıq olacaq.
Comments